எப்பேர்ப்பட்ட பல்வலியையும் சரிசெய்ய இந்த வீட்டு வைத்தியங்களை ட்ரை பண்ணுங்க...

நம் வாழ்வில் ஒரு கட்டத்தில் நாம் அனைவருமே பல் வலியை அனுபவித்து இருப்போம். பல வகையான காரணங்களால் பல்வலி ஏற்படுகிறது. பற்கள் மற்றும் அதை சுற்றியுள்ள ஈறுகளில் ஏற்படும் பாதிப்பால் பல் வலி ஏற்படுகிறது. பல் சிதைவு, தொற்று, தளர்வான அல்லது பலவீனமான ஈறுகள், போன்ற பிரச்சனைகளும் பல் வலியை ஏற்படுத்துகின்றன. பல் சுகாதாரத்தில் பிரச்சனை ஏற்படும்போது இந்த மாதிரியான விளைவுகளை நாம் சந்திக்க வேண்டியுள்ளது.

​பல் வலி

பல்வலி ஒரு மோசமான விஷயமாகும். சிலருக்கு அது தாங்கி கொள்ள முடியாத வலியாக உள்ளது. இதில் மோசமான விஷயம் என்னவென்றால் இது விரைவாக உங்கள் தாடை மற்றும் தலையில் வலியை ஏற்படுத்துகிறது. இந்த வலி மற்றும் அதனால் ஏற்படும் அசெளகரியங்களை தடுப்பதற்கு சில வீட்டு வைத்தியங்கள் உதவுகின்றன. இதற்கு நிவாரணம் அளிக்க உதவும் பல பொருட்கள் உங்கள் வீட்டு சமையல் அறையிலேயே உள்ளன தெரியுமா? அவற்றை இப்போது வரிசையாக பார்ப்போம்.

​கிராம்பு

பல்வலிக்கு தமிழ்நாட்டில் பழங்காலம் முதலே பயன்படுத்தப்பட்டு வரும் ஒரு மூலிகை கிராம்பு ஆகும். இது பாக்டீரியா எதிர்ப்பு மற்றும் அழற்சி எதிர்ப்பு பண்புகளை கொண்டுள்ளது. கூடுதலாக இது யூஜெனோலை கொண்டுள்ளது. இந்த யூஜெனோல் ஒரு ரசாயன கலவையாகும். இது இயற்கை மயக்க மருந்தாக செயல்படுகிறது. இந்த பண்புகள் பற்களில் உள்ள நரம்புகள் உணர்ச்சி இழக்கவும் வலியில் இருந்து நிவாரணம் பெறவும் உதவுகிறது.

நேரடியாக நாம் கிராம்பை வாயில் வைத்து மெல்லலாம். இதன் மூலம் அதன் எண்ணெயானது பற்களை போய் சேரும். அல்லது ஒரு பருத்தி பஞ்சில் கிராம்பு எண்ணெயை சில துளிகள் இட்டு அதை பல் வலிக்கும் இடத்தில் தேய்க்கலாம்.

​உப்பு நீர் கொப்பளித்தல்

பல் வலி ஏற்படும்போது உங்கள் வாயை வெது வெதுப்பான உப்பு நீரில் கழுவுதல் என்பது உங்களுக்கு நல்ல பலனளிக்கும். உங்களுக்கு பல்வலி மற்றும் ஈறுகளில் வீக்கம் இருக்கும்போது உங்கள் வாயை வெது வெதுப்பான உப்புநீரில் கழுவுவது பற்களுக்கு இடையே உள்ள உணவு துகள்களை வெளியேற்ற உதவுகின்றன. இது வீக்கத்தை குறைக்கவும் தொண்டை வறட்சியை சரி செய்யவும் உதவுகிறது.

​ஐஸ் பேக்

பல் வலியை குறைக்க ஐஸ் கட்டியை பயன்படுத்தலாம். குறிப்பாக பல் வலி ஏற்படும் இடத்தை சுற்றி காயம் அல்லது வீக்கம் இருந்து அதனால் பல் வலி ஏற்படுகிறது எனில் பாதிக்கப்பட்ட பகுதியில் ஐஸ் கட்டியை பயன்படுத்தலாம். ஐஸை ஒரு பேக்கில் வைத்து ஒத்தடம் கொடுக்கலாம். 15 நிமிடங்கள் இப்படி ஒத்தடம் கொடுக்கலாம். வலி மிகுந்த இடத்தில் ஐஸ் கட்டியை பயன்படுத்தும் போது அது வலியை குறைக்க உதவுகிறது.

​பூண்டு

பூண்டு ஒரு மருத்துவ தாவரமாகும். இந்திய உணவிலும் சமையல் அறையிலும் பூண்டுக்கு என்று தனி இடம் உண்டு. பூண்டு அல்லிசின் எனப்படும் ஆண்டி பாக்டீரியல் மற்றும் ஆண்டி மைக்ரோபியல் கலவையை கொண்டுள்ளது. இவை பல் வலியில் இருந்து நிவாரணம் அளிக்கிறது, பூண்டை அரைத்து அதை பேஸ்ட் போல செய்து பற்களில் தடவி கொள்ளலாம். அல்லது பூண்டை வாயில் வைத்து கிராம்பு போலவே மெல்லலாம். அதிக பல் வலியை கொண்டவர்கள் பூண்டு எண்ணெயை பாதிக்கப்பட்ட இடத்தில் பயன்படுத்தலாம்.

​புதினா

உலகம் முழுவதும் பயன்படுத்தப்படும் ஒரு நறுமண தாவரமாக புதினா உள்ளது. உங்கள் பற்களில் அல்லது ஈறுகளில் வலி ஏற்படும்போது சூடான புதினா தேநீர் அதற்கு நிவாராணம் அளிக்கலாம். இது உங்கள் பற்கள் மற்றும் ஈறுகளில் ஏற்படும் வலியை குறைக்க உதவுகிறது. இந்த தேநீர் பாக்டீரியா எதிர்ப்பு பண்புகளை கொண்டுள்ளது. இதனால் இது பல் வலிக்கு நன்மை பயக்கிறது. கூடுதலான இதில் மெண்டோல் உள்ளது. இது பல் வலியை குறைக்க அதிக அளவில் உதவுகிறது.

​தைம்

தைம் நறுமணம் கொண்ட ஒரு தோட்ட செடி ஆகும். மேலும் இது பல்வேறு மருத்துவ குணங்களை கொண்டுள்ளது. பல்வலிக்கு இது ஒரு சிறந்த தீர்வாகும். ஒரு பருத்தி பஞ்சில் சில துளிகள் தைம் எண்ணெயை விட்டு அதில் சிறிது தண்ணீரையும் கலக்கவும். பிறகு வாயில் பாதிக்கப்பட்ட பகுதியில் அதை தடவவும். தைம் உங்கள் வாயில் உள்ள தீங்கு விளைவிக்கும் பாக்டீரியாக்களை அகற்றவும் தொற்றுநோயை குறைக்கவும் உதவுகிறது.

​மஞ்சள்

நமது ஊர்களில் பல வகையான விஷயங்களுக்கு மஞ்சள் பயன்படுத்தப்பட்டு வருகிறது. மஞ்சள் நம் மக்களால் நன்கு அறியப்பட்ட ஒரு மூலிகையாகும். இது அழற்சி எதிர்ப்பு பண்புகளையும் பாக்டீரியா எதிர்ப்பு பண்புகளையும் கொண்டுள்ளது. இது பற்களில் தொற்று ஏற்படும்போது அதன் வலியை குறைக்கிறது. ஒரு டீஸ்பூன் மஞ்சள் தூளில் சில சொட்டுக்கள் நீர் சேர்த்து அதை பேஸ்ட் போல கலக்கவும். இப்போது அதை நேரடியாக உங்கள் வாயில் பாதிக்கப்பட்ட பகுதியில் தடவலாம். பிறகு 5 முதல் 10 நிமிடங்கள் வரை வாயில் வைத்திருந்துவிட்டு வாய் கொப்பளிக்கலாம். இது எளிதானது மற்றும் உங்கள் பல் வலியை தற்காலிகமாக குறைக்க உதவுகிறது.

இந்த வீட்டு வைத்தியங்கள் அனைத்தும் உங்கள் பல் வலியை தற்காலிகமாக குறைத்து நிவாரணம் அளிக்க மட்டுமே உதவும். இவை முழுமையாக பல் வலியை சரி செய்யாது. ஒருவேளை இந்த செயல்பாடுகளை செய்த பிறகும் கூட பல் வலி சரியாகவில்லை எனில் உடனே பல் மருத்துவரை அணுகுவது நல்லது.