. -->
.PLEASE WAIT 3 SECONDS..
.AFTER APPEARING ARROW AND TOUCH THAT..

Now Online

Thursday, 4 June 2020

தமிழ்நாட்டில் கரோனோ பாதித்தவர்களின் மாவட்ட வாரியான விவரம்(04.06.2020)




தமிழகத்தில் இன்று ஒரே நாளில் 1384 பேருக்கு கொரோனா தொற்று உறுதி




*தமிழகத்தில் இதுவரை இல்லாத அளவிற்கு இன்று ஒரே நாளில் 1,384 பேருக்கு கொரொனா உறுதி செய்யப்பட்டுள்ளதாக சுகாதாரத்துறை உச்சகட்ட அதிர்ச்சி தகவலை வெளியிட்டுள்ளது. தமிழகத்தில் 1,373 பேர், பிற மாநிலம், நாடுகளில் இருந்து வந்த 11 பேர் என 1,384 பேருக்கு கொரொனா உறுதியாகியுள்ளது. இதன் மூலம் கொரொனா பாதிப்பு எண்ணிக்கை 25,872இல் இருந்து 27,256ஆக அதிகரித்துள்ளது.

சம்பளம் வருமா? வராதா?; பணிக்கு திரும்பாத ஊழியர்கள் கலக்கம்; ஊரடங்கில் முழு ஊதியம் வழங்க கோரிய அரசாணையை திரும்பப் பெற்றது மத்திய அரசு...!

 பொதுமுடக்க காலத்தில் ஊழியர்களுக்கு நிறுவனங்கள் முழு ஊதியம் வழங்க வேண்டும் என்ற அரசாணையை மத்திய அரசு திரும்பப் பெற்றது. கொரோனா பரவல் காரணமாக முதலில் அமல்படுத்தப்பட்ட பொதுமுடக்கம் மார்ச் 25 முதல் மே 14-ம் தேதி வரை மட்டுமே நடைமுறையில் இருந்தது. இதன், காரணமாக நாடு முழுவதும் ஊரடங்கு அமல்படுத்தப்பட்டதால் அரசு மற்றும் தனியார் நிறுவனங்கள் அனைத்தும் மூடப்பட்டன. இருப்பினும் இந்த ஊரடங்கு காலங்களில் நிறுவனங்கள் அவர்களது ஊழியர்களின் சம்பளத்தில் பிடித்தம் செய்யாமால் முழு ஊதியத்தை அளிக்க வேண்டும் என மத்திய அரசு தெரிவித்தது.

 ஊழியர்களை பணி நீக்கம் செய்யக் கூடாது என பிரதமர் மோடி நிறுவனங்களுக்கு வேண்டுகோள் விடுத்தார்.இதற்கிடையே, பொதுமுடக்கம் கடந்த 70 நாட்களுக்கு மேலான அமலில் உள்ளதால், ஊழியர்களுக்கு முழு ஊதியம் அளிக்க முடியாது. எனவே, மத்திய அரசின் உத்தரவை ரத்து செய்யக்கோரி நிறுவனங்கள் உச்சநீதிமன்றத்தில் வழக்கு தொடர்ந்தனர். இந்த வழக்கில் உச்சநீதிமன்றத்தில் மத்திய அரசு பிரமாணப்பத்திரம் தாக்கல் செய்தது. ஊரடங்கு காரணமாக தனியார் நிறுவனங்கள் மூடப்பட்ட நிலையில், அதனை காரணம் காட்டி ஊழியர்களுக்கு வாங்கும் சம்பளத்தில் பிடித்தம் செய்யக் கூடாது என அரசு அரசாணை வெளியிடப்பட்டது. ஆனால் இந்த உத்தரவு மார்ச் 25 ஆம் தேதி முதல் மே 17 வரை மட்டுமே, அதாவது இந்த 54 நாட்களுக்குப் பிறகு அரசாணையானது திரும்பப் பெறப்பட்டு விட்டது. அதன் பின்னர் பணிக்கு திரும்பாத ஊழியர்களுக்கு நிறுவனங்கள் ஊதியம் வழங்க வேண்டியது அவசியமில்லை என அதில் குறிப்பிடப்பட்டுள்ளது. இதனால், போதிய போக்குவரத்து இல்லாத காரணத்தினால் பணிக்கு திரும்ப முடியாமல் வீட்டில் உள்ள ஊழியர்கள் கலக்கத்தில் உள்ளனர்.
Source Dinakaran

தனியார் பள்ளிகளில் இணைய வழி வகுப்புகள் தொடக்கம்



பொது முடக்கத்தால் பள்ளி, கல்லூரிகளில் இணைய வழி வகுப்புகள் தொடங்கப்பட்டுள்ளது. இதனால் செல்லிடப்பேசிகளின் விற்பனை அதிகரித்துள்ளதோடு, தட்டுப்பாடும் விலை உயர்வும் ஏற்பட்டுள்ளது.
 நாடு முழுவதும் கரோனா நோய்த் தொற்று பரவலைக் கட்டுப்படுத்த, கடந்த மார்ச் 24ம் தேதியிலிருந்து பொது முடக்கம் தொடர்ந்து வருகிறது. இன்னும் நோய்த்தொற்று கட்டுக்குள் வராத நிலையில், பள்ளி, கல்லூரிகளை ஜூலை மாதத்திற்கு பிறகே திறப்பதற்கான வாய்ப்புகள் இருப்பதாகக் கூறப்படுகிறது.
 இதனால் பெரும்பாலான தனியார் பள்ளி மற்றும் கல்லூரிகள், மாணவ-மாணவியருக்கு இணையவழியில் வகுப்புகள் நடத்தும் பணியைத் தொடங்கியுள்ளன. இணைய வழியில் படிப்பதற்கு மாணவ-மாணவியருக்கு 4 ஜி ஆண்ட்ராய்ட்  வசதிகளுடன் கூடிய செல்லிடப்பேசிகள் அத்தியாவசியமாகியுள்ளது. எனவே, இணைய வழியில் வகுப்புகள் நடத்தப்படுவதாகப் பள்ளி, கல்லூரிகள் அறிவித்துள்ளதால், தங்களது குழந்தைகளுக்கு செல்லிடப்பேசிகளைப் வாங்கி கொடுப்பதில் பெற்றோர்கள் ஆர்வம் காட்டி வருகின்றனர். இதனால், செல்லிடப்பேசிகள் விற்பனை அதிகரித்துள்ளது, பல இடங்களில் செல்லிடப்பேசிகளுக்கு தட்டுப்பாடும்,  விலை உயர்வும் ஏற்பட்டுள்ளது.
 இதுகுறித்து வாழப்பாடிச் சேர்ந்த மகேஸ்வரி(30) கூறியதாவது: 
 எனது மகள்கள் இருவரும் தனியார் பள்ளியில் படித்து வருகின்றனர். 

இணையவழியில் வகுப்புகளை நடத்துவதால், இருவருக்கும் செல்லிடப்பேசிகள் வாங்கிக்கொடுக்க வேண்டுமெனப் பள்ளி நிர்வாகத்தின் வாயிலாகத் தெரிவிக்கப்பட்டுள்ளது. இதனால், வேறுவழியின்றி குழந்தைகளுக்காக புதிய செல்லிடப்பேசி வாங்கி கொடுக்க வேண்டிய கட்டாயத்தில் தள்ளப்பட்டுள்ளோம். ஒரு செல்லிடப்பேசி குறைந்தபட்சம் ரூ.8 ஆயிரம் முதல் ரூ.10 ஆயிரம் வரை செலவு செய்ய வேண்டிய நிர்ப்பந்தம் ஏற்பட்டுள்ளது. ஏராளமானோர் குழந்தைகளுக்காகச் செல்பேசிகளைக் கொள்முதல் செய்து வருவதால், தட்டுப்பாடு ஏற்பட்டுள்ளதால் விலையும் உயர்ந்துள்ளது என்றார்.

10ஆம் வகுப்பு பொதுத் தேர்வை மாணவர்கள் இருக்கும் இடத்திலேயே எழுத அரசு ஆவன செய்ய வேண்டும்



10ஆம் வகுப்பு பொதுத் தேர்வை மாணவ, மாணவிகள் இருக்கும் இடங்களிலேயே எழுதுவதற்கு தமிழக அரசு ஆவன செய்ய வேண்டும் எனக் கல்வியாளர்கள் வலியுறுத்தியுள்ளனர்.
சீனாவில் உருவாக்கப்பட்ட கரோனா தொற்று நோய் அணு ஆராய்ச்சி நிலையம் முதல், ஆப்பம் சுடும் பாட்டி வரை உலகத்தில் உள்ள அனைவரையுமே ஆட்டிப்படைத்துக் கொண்டிருக்கிறது. இந்நிலையில், இந்த கல்வியாண்டில் 10ஆம் வகுப்பு தேர்வு எழுதும் மாணவ, மாணவிகளுக்கும் பெரும் சவாலாக உள்ளது. மருந்தே இல்லாத நிலையில், கரோனா தொற்று நாளுக்கு நாள் அதிகரித்துக் கொண்டே தான் இருக்கிறது. 10ஆம் வகுப்பு தேர்வை நடத்தியே ஆக வேண்டும் என்ற நிலை அரசுக்கு உள்ளது. 10ஆம் வகுப்புக்கு நடத்தப்படாத தேர்வுகள் வரும் 15ஆம் தேதி முதல் தேர்வு நடத்த அரசு அறிவித்து, இன்று 4ஆம் தேதி முதல் ஹால் டிக்கெட்டையும் பெற்றுக் கொள்ளலாம் எனவும் அரசு அறிவித்துள்ளது.
இந்நிலையில், இந்த அறிவிப்பானது மாணவ, மாணவிகள் மத்தியிலும், பெற்றோர்கள் மத்தியிலும், பொது மக்கள் மத்தியிலும் பெரிய அச்சத்தை உண்டாக்கியுள்ளது. ஒரு கல்வியாண்டில் மொத்த பள்ளி நாட்கள் 210 நாட்கள்தான். இந்த நாட்களுக்குள் 10, 11, 12 உள்ளிட்ட வகுப்புகளுக்குத் தேர்வுகள் நடந்து முடிந்து விடும். தற்போது, கரோனா தொற்று ஊரடங்கு உள்ளிட்ட காரணங்களால் இரண்டு மாதங்களுக்கு மேலாக தேர்வை தள்ளி வைக்கப்பட்ட நிலையில், மாணவ, மாணவிகள், பெற்றோர்கள் மற்றும் ஆசிரியர்கள் மன உளைச்சலுக்கு ஆளாகியுள்ளனர்.

 தேர்வைத் தள்ளி வைப்பதாலும், மேலும் மாணவர்கள் மன அழுத்தத்திற்கும் உட்படும் நிலை உருவாகும். 
 தேர்வை ரத்து செய்து விட்டு, ஆண்டு இறுதியில் நடைபெற்ற திருப்புதல் தேர்வில் பெற்ற மதிப்பெண்களில் அதிகப்பட்ட மதிப்பெண்களை எடுத்துக் கொள்ளலாம். அதன் அடிப்படையில், பதினொன்றாம் வகுப்புக்கான சிறப்புப் பாடத்தைத் தேர்வு செய்ய முடியும். திருப்புதல் தேர்வுக்கு வராத மாணவர்களுக்கு என்ன செய்வது என்ற ஒரு சந்தேகம் எழும். திருப்புதல் தேர்வுக்கு வராதவர்களுக்குத் தேர்ச்சிக்கான மதிப்பெண்களை அவர்களுக்கு வழங்கி, தேர்ச்சி அளிக்கலாம்.
 தேர்வு தொடர்பாக தினம் ஒரு அறிவிப்பு வருவதால், கல்வித்துறையின் நம்பகத்தன்மை பொதுமக்களிடம் விமர்சனத்திற்கு உட்பட்டு வருகிறது. இதனையும் கருத்தில் கொண்டு, இனி மாணவர்களைத் தேர்வு, தேர்வு என்ற அச்சத்தை ஏற்படுத்தாமல் தேர்வை ரத்து செய்யலாம். தேர்வு எழுதித்தான் ஆக வேண்டும் என்றால், உரிய பாதுகாப்புடன் தற்போது உள்ள சூழலில் மாணவ, மாணவிகள் இருக்கும் இடத்திற்கு அருகில் உள்ள பள்ளிகளிலேயே தேர்வு எழுத தமிழக அரசு அனுமதிக்க வேண்டும் அல்லது தேர்வை முழுமையாக ரத்து செய்துவிட்டு, இறுதியாக நடந்த திருப்புதல் தேர்வில் பெறப்பட்ட மதிப்பெண் என அதிகமோ அதைக் கணக்கிட்டுக் கொள்வது சாலச் சிறந்தது. 
 இதை வைத்து பதினொன்றாம் வகுப்பிற்கான விருப்பப் பாடத்தை எடுத்துத் தேர்வு செய்ய மாணவர்களை அனுமதிக்கலாம். 

தமிழகத்தில், சுமார் 9 லட்சத்து 45 ஆயிரம் மாணவ, மாணவிகள் தேர்வு எழுதும் நிலையில், ஆயிரக்கணக்கான மாணவர்கள் கரோனா தொற்றால் ஊரு விட்டு ஊர் சென்றுள்ளனர். மாவட்டம் விட்டு மாவட்டம் சென்றுள்ளனர். மாணவ, மாணவிகள் படிப்பது ஒரு பள்ளியில், தேர்வு எழுதும் மையம் மற்றொரு பள்ளியில். இந்நிலையில் கரோனா தொற்றால் வேறொரு மாவட்டத்தில் உள்ளனர்.
 தற்போது, தேர்வு எழுத வர வேண்டும் என்றால், மாணவர்களுடன், பெற்றோர்களும் மாவட்டம் விட்டு, மாவட்டம் வர வேண்டிய நிலை ஏற்படுகிறது. அவர்கள் எங்கு தங்குவது, எங்கு சாப்பிடுவது. உறவினர்களே அனுமதிக்க முடியாத நிலை. மேலும், மாவட்டம் விட்டு மாவட்டம் வருவதால் தனிமைப் படுத்தப்பட வேண்டிய நிலை. 
 கரோனா தொற்று ஏற்படும் அபாயமும் உருவாகும். இவற்றைப் போக்க வேண்டும் என்றால், அந்தந்த ஊரிலேயே 10 ஆம் வகுப்புக்கான ஹால் டிக்கெட்டை வைத்துக் கொண்டு, அங்குள்ள பள்ளிகளிலேயே தேர்வு எழுதச் சொல்லி அரசு உத்தரவிடலாம். தேர்வு நடத்தியே ஆக வேண்டும் என்பது மாணவர்களுக்கு மன உளைச்சலைத் தருகிறது. தேர்வைத் தள்ளி வைப்பதாலும் மாணவர்களுக்கு மன உளைச்சலைத்தான் ஏற்படுத்துகிறது. இதை தமிழக அரசு கவனத்தில் கொண்டு, மாற்று ஏற்பாட்டை மேற்கொள்வது பெரும் பாதுகாப்பைக் கொடுக்கும் எனக் கல்வியாளர்களும், பெற்றோர்களும் எதிர்பார்க்கிறார்கள்.

Source Dinamani

தனியார் மருத்துவமனைகளில் முதலமைச்சரின் காப்பீடு திட்டத்தில் கரோனாவுக்கு சிகிச்சை தர உத்தரவு; கட்டண விவரத்தை வெளியிட்டது தமிழக அரசு



முதலமைச்சரின் விரிவான காப்பீட்டுத் திட்டத்தின் கீழ் தனியார் மருத்துவமனைகளில் கரோனா தொற்றுக்கு சிகிச்சை வழங்க முதல்வர் எடப்பாடி பழனிசாமி உத்தரவிட்டுள்ளார். அதற்கான கட்டண விவரங்கள் குறித்தும் விளக்கியுள்ளது.

இது தொடர்பாக இன்று (ஜூன் 4) வெளியிட்ட அறிவிப்பு:

“தமிழக அரசு, முதல்வரின் சீரிய தலைமையில், கரோனா தொற்று தடுப்பு மற்றும் சிகிச்சை குறித்து பன்முக நடவடிக்கைகளை சிறப்பான முறையில் மேற்கொண்டு வருகிறது. கரோனா தொற்றுக்கு இதுவரை பொதுவாக அரசு மருத்துவமனைகளில் மட்டுமே சிகிச்சை அளிக்கப்பட்ட நிலையில், முதலமைச்சரின் விரிவான காப்பீட்டுத் திட்டத்தின் கீழ் தனியார் மருத்துவமனையில் சிகிச்சை அளிப்பதற்கு முதல்வர் ஆணையிட்டுள்ளார்.

முதல்வரின் ஆணைக்கிணங்க, கரோனா சிகிச்சைக்கு தமிழக முதலமைச்சரின் விரிவான காப்பீட்டுத் திட்டத்தின் கீழ், தனியார் மருத்துவமனையில் சிகிச்சை அளிக்க தனியார் மருத்துவமனைகளுக்கு அரசு வழங்க வேண்டிய தொகுப்புக் கட்டணங்கள் குறித்து மக்கள் நல்வாழ்வுத் துறை செயலாளர் தலைமையில் ஒரு குழு அமைக்கப்பட்டது.

இக்குழு தனியார் மருத்துவமனைக்கு தமிழக அரசால் இத்திட்டத்தின் கீழ் வழங்கப்படவேண்டிய கட்டணத்தை நிர்ணயித்தும் ஒருசில நிபந்தனைகளுடன் கூடிய தனது அறிக்கையை அளித்தது. அதனை நன்கு பரிசிலித்த தமிழக அரசு, கீழ்கண்ட கட்டணங்களை நிர்ணயித்து ஒப்புதல் அளித்தது.

நிபந்தனைகள்

1. அங்கீகரிக்கப்பட்ட தனியார் மருத்துவமனைகளின் உள்ள மொத்த படுக்கை எண்ணிக்கையில் குறைந்தபட்சம் 25 விழுக்காட்டை முதலமைச்சரின் காப்பீட்டுத் திட்டத்தின் கீழ் சிகிச்சைக்கு வரும் கரோனா நோயாளிகளுக்குப் பிரத்யேகமாக ஒதுக்கீடு செய்ய வேண்டும்.

2. முதலமைச்சரின் விரிவான மருத்துவக் காப்பீட்டுத் திட்டப் பயனாளிகள் மருத்துவமனைகளுக்கு எந்த ஒரு கட்டணமும் செலுத்தத் தேவையில்லை.

3. நிர்ணயிக்கப்பட்ட கட்டணத்திற்கு மேலாக தொகை செலுத்தக் கோரும் மருத்துவமனைகளின் மீது முதலமைச்சரின் விரிவான காப்பீட்டுத் திட்டத்தின் கீழ் வழங்கப்பட்ட அங்கீகாரம் ரத்து செய்யப்படும்.

4. மேலும் விவரங்கள் மற்றும் புகாருக்கு – 1800 425 3993 என்ற கட்டணமில்லா தொலைபேசி எண்ணைத் தொடர்பு கொள்ளவும்.

கரோனா தொற்றினால் ஏற்பட்டுள்ள உலகளாவிய மருத்துவப் பேரிடர் காலத்தில் அரசு மருத்துவமனைகளும் தனியார் மருத்துவமனைகளும் இணைந்து செயல்படும். இந்தப் புதிய அறிவிப்பு, தமிழ்நாட்டில் முதலமைச்சரின் விரிவான காப்பீட்டுத் திட்டத்தின் கீழ் ஏற்கெனவே பதிவு செய்து பயன்பெறத் தகுதியான குடும்பங்களுக்குப் பொருந்தும். தமிழ்நாடு முதல்வரால் எடுக்கப்பட்டு வரும் இந்த நடவடிக்கைகளால், கரோனா சிகிச்சை முறைகளை மேலும் வலுப்படுத்தும் என்பது குறிப்பிடத்தக்கது”.

Source The Hindu Tamil

பத்தாம் வகுப்பு மாணவிக்கு கொரோனா



சென்னையிலிருந்து 10-ம் வகுப்பு பொதுத்தேர்வுக்காக கொடைக்கானல் சென்ற மாணவிக்கு கொரோனா தொற்று உறுதி செய்யப்பட்டுள்ளது. 

கொடைக்கானல் செல்லும் வழியில் மேற்கொள்ளப்பட்ட பரிசோதனையில் மாணவிக்கு கொரோனா தெரியவந்துள்ளது.

சென்னையில் கொரோனா பாதிப்பு மண்டல வாரியாக விவரங்களை மாநகராட்சி வெளியீடு

சென்னையில் உள்ள 15 மண்டலங்களில் எந்தெந்த மண்டலங்களில் எத்தனை பேர் பாதிக்கப்பட்டுள்ளனர் என்ற விவரத்தை மாநகராட்சி வெளியிட்டுள்ளது.

கொரோனா வைரஸ்
சென்னையில் உள்ள 15 மண்டலங்களில் எந்தெந்த மண்டலங்களில் எத்தனை பேர் பாதிக்கப்பட்டுள்ளனர் என்ற விவரத்தை மாநகராட்சி வெளியிட்டுள்ளது.

தமிழகத்தில் கொரோனா பாதித்தவர்களின் எண்ணிக்கை 25,872ஆக அதிகரித்துள்ளது. கொரோனாவுக்கு 14,316 பேர் குணமடைந்து வீடு திரும்பியுள்ளனர். கொரோனாவுக்கு உயிரிழந்தோர் எண்ணிக்கை 208-ஆக அதிகரித்துள்ளது.
அதிகபட்சமாக சென்னையில் நேற்று ஒரே நாளில் 1,012 பேருக்கு கொரோனா தொற்று உறுதி செய்யப்பட்டு உள்ளது. இதையடுத்து கொரோனாவால் பாதிப்பு அடைந்தோர் எண்ணிக்கை 17,598 ஆக அதிகரித்துள்ளது. 9,034 பேர் குணமடைந்து வீடு திரும்பியுள்ளனர். சென்னையில் மட்டும் உயிரிழந்தோர் எண்ணிக்கை 158-ஆக உள்ளது.

சென்னையில் உள்ள 15 மண்டலங்களில் எந்தெந்த மண்டலங்களில் எத்தனை பேர் பாதிக்கப்பட்டுள்ளனர் என்ற விவரத்தை மாநகராட்சி வெளியிட்டுள்ளது.

15 மண்டலங்களில் அதிகபட்சமாக ராயபுரத்தில் 3,224 பேருக்கு கொரோனா தொற்று கண்டறியப்பட்டுள்ளது.

கோடம்பாக்கத்தில் 2,029 பேருக்கும், திரு.வி.க.நகரில் 1,798 பேருக்கும், அண்ணாநகரில் 1,525 பேருக்கும் கொரோனா பாதிப்பு உறுதியாகியுள்ளது.

தண்டையார்பேட்டையில் 2,093 பேரும், தேனாம்பேட்டையில் 2,014 பேரும், திருவொற்றியூரில் 610 பேரும், கொரோனாவால் பாதிக்கப்பட்டுள்ளனர். வளசரவாக்கத்தில் 939 பேருக்கும், பெருங்குடியில் 301 பேருக்கும், அடையாறில் 1007 பேருக்கும், அம்பத்தூரில் 651 பேருக்கும் கொரோனா தொற்று கண்டறியப்பட்டுள்ளது. ஆலந்தூரில் 261 பேருக்கும், மாதவரத்தில் 431 பேருக்கும், சோழிங்கநல்லூரில் 306 பேருக்கும், மணலியில் 246 பேருக்கும் தொற்று உறுதியாகியுள்ளது.

Source Maalaimalar

DEE - பொதுத்தேர்வு பணிகளுக்கு தொடக்கக் கல்வி ஆசிரியர்களை பயன்படுத்துதல் - இயக்குநரின் செயல்முறைகள்!


கோவிட் - 19 தொற்று காரணமாக 10 ம் வகுப்பு அரசுப் பொதுத்தேர்வானது மாணவர்கள் அவர்கள் பயின்ற பள்ளியிலேயே பொதுத்தேர்வு எழுதலாம் என அரசால் முடிவு செய்யப்பட்டுள்ளது. இதன் பொருட்டு மாவட்டங்களில் அதிக எண்ணிக்கையில் 10ம் வகுப்பு பொதுத்தேர்வு மையங்கள் ஏற்படுத்தப்பட்டுள்ளது.



மேற்கண்ட காரணங்களினால், 10ம் வகுப்பு அரசு பொதுத்தேர்வுப்பணிக்கு ஆசிரியர்கள் அதிக அளவில் ஈடுபடுத்தப்பட வேண்டிய தேவை உள்ளது. எனவே , தொடக்கக் கல்வி இயக்ககத்தின் கீழ் பணிபுரியும் அலுவலர்கள் தலைமை ஆசிரியர்கள் / ஆசிரியர்களை 10ம் வகுப்பு மற்றும் பிற அரசு பொதுத் தேர்வுப் பணிக்கு தேவை ஏற்படும்பட்சத்தில் பயன்படுத்திக்கொள்ளலாம் என அனைத்து மாவட்ட முதன்மைக் கல்வி அலுவலர்களுக்கும் தெரிவிக்கப்படுகிறது.

மேலும் தேர்வுப் பணியில் நடுநிலைப்பள்ளிகளில் பணிபுரியும் பட்டதாரி ஆசிரியர்களுக்கு முன்னுரிமை வழங்கலாம் எனத் தெரிவிக்கப்படுகிறது.

கொரோனா சிகிச்சை: தனியார் மருத்துவமனை கட்டணம் எவ்வளவு..? ஐஎம்ஏ தமிழகப் பிரிவு பரிந்துரை




லேசான பாதிப்புள்ள நோயாளிக்கு 10 நாட்கள் சிகிச்சை கட்டணமாக ரூ.2,31,820 வசூலிக்க பரிந்துரை

திவிர சிகிச்சை பெறும் கொரோனா நோயாளிக்கு 17 நாட்கள் கட்டணமாக ரூ.4,31,411 நிர்ணயம்

- ஐஎம்ஏ தமிழகப் பிரிவு!

கொரோனா சிகிச்சைக்காக தனியார் மருத்துவமனைகள் கட்டணம் வசூல் செய்ய வழிமுறைகள் வகுக்கப்பட்டுள்ளன.


கொரோனாவுக்கு தனியார் மருத்துவமனையின் கட்டண விவரங்களை அரசுக்கு ஐ.எம்.ஏ. தமிழகப் பிரிவு பரிந்துரைத்தது. சாதாரண நோயாளிக்கு 10 நாட்கள் சிகிச்சை கட்டணமாக சுமார் ரூ.2,31,820 வசூலிக்க இந்திய மருத்துவ கழகத்தின் தமிழக பிரிவு பரிந்துரை செய்துள்ளது. தீவிர சிகிச்சை பெரும் கொரோனா நோயாளிகளுக்கு 17 நாள்கள் கட்டணமாக ரூ.4,31,411 நிர்ணயிக்கப்பட்டுள்ளது. மருத்துவர்கள், தனிமைப்படுத்தப்படும் பணியாளர்களுக்கான கட்டணமாக ஒரு நாளைக்கு ரூ.9,600 வரை நிர்ணயிக்கலாம்.


மின் கட்டணம் செலுத்த ஜூன் 15 வரை அவகாசம் நீட்டிப்பு




*தமிழகத்தில் சென்னை, காஞ்சிபுரம், திருவள்ளூர், செங்கல்பட்டு மாவட்டங்களில் ஜூலை 6ம் தேதி அவகாசம் நீட்டிப்பு

*பிற மாவட்டங்களுக்கு மின் கட்டணம் செலுத்த ஜூன் 15-ம் தேதி வரை அவகாசம் நீட்டிக்கப்பட்டுள்ளது

சென்னை தலைமை செயலகத்தில் 30 ஊழியர்களுக்கு தொற்று உறுதி


சென்னையில் பெண் ஐ.ஏ.எஸ். அதிகாரி மற்றும் தலைமை செயலக ஊழியர்கள் 30 பேர் கொரோனாவால் பாதிக்கப்பட்டுள்ளனர். தி.மு.க.எம்.எல்.ஏ.வும் ஆஸ்பத்திரியில் தீவிர சிகிச்சை பெற்று வருகிறார்.

சென்னை தலைமை செயலகம்
சென்னையில் பெண் ஐ.ஏ.எஸ். அதிகாரி மற்றும் தலைமை செயலக ஊழியர்கள் 30 பேர் கொரோனாவால் பாதிக்கப்பட்டுள்ளனர். தி.மு.க.எம்.எல்.ஏ.வும் ஆஸ்பத்திரியில் தீவிர சிகிச்சை பெற்று வருகிறார்.

சென்னை:

அரசு பல்வேறு தீவிர நடவடிக்கைகளை எடுத்து வந்த போதிலும், தமிழகத்தில் கொரோனா புயல் வேகத்தில் பரவுகிறது.

தமிழகத்தில் நேற்று ஒரே நாளில் மட்டும் 1,286 பேருக்கு கொரோனா தொற்று உறுதி செய்யப்பட்டது. இதைத்தொடர்ந்து தமிழகத்தில் கொரோனாவால் பாதிக்கப்பட்டவர்களின் எண்ணிக்கை 25 ஆயிரத்து 872 ஆக அதிகரித்து உள்ளது.

கொரோனாவால் நேற்று பாதிக்கப்பட்ட 1,286 பேரில் 1,012 பேர் சென்னையைச் சேர்ந்தவர்கள். சென்னையில் நேற்று முதன் முதலாக கொரோனா பாதிப்பு ஆயிரத்தை தாண்டி இருக்கிறது. செங்கல்பட்டு மாவட்டத்தில் 61 பேருக்கும், திருவள்ளூர் மாவட்டத்தில் 58 பேருக்கும், காஞ்சிபுரம் மாவட்டத்தில் 19 பேருக்கும் நேற்று நோய்த் தொற்று உறுதி செய்யப்பட்டது.

சென்னையில் கொரோனாவால் பாதிக்கப்பட்டவர்களின் எண்ணிக்கை 15 ஆயிரத்து 598 ஆக அதிகரித்து இருக்கிறது.

தமிழகத்தில் நேற்று ஒரே நாளில் மட்டும் கொரோனாவுக்கு 11 பேர் பலி ஆனார்கள். இதைத்தொடர்ந்து, மாநிலத்தில் பலி எண்ணிக்கை 208 ஆக உயர்ந்தது.

நேற்று உயிர் இழந்த 11 பேரில் 8 பேர் சென்னையைச் சேர்ந்தவர்கள். செங்கல்பட்டு மாவட்டத்தில் 2 பேரும், திருச்சியில் 70 வயது பெண் ஒருவரும் உயிர் இழந்து இருக்கிறார்கள்.

என்றாலும் மற்ற மாநிலங்களுடன் ஒப்பிடும் போது தமிழகத்தில் கொரோனாவால் உயிர் இழப்பவர்களின் சதவீதம் குறைவாகவே உள்ளது.

சென்னையில் தலைமைச் செயலகம் உள்பட தமிழகத்தின் அனைத்து அரசு அலுவலகங்களும் 50 சதவீத ஊழியர்களை கொண்டு கடந்த மே 18-ந் தேதி முதல் இயங்கி வருகின்றன. அரசு ஊழியர்கள் அனைவரும் 2 பிரிவாக பிரிக்கப்பட்டு சுழற்சி முறையில் பணியாற்றி வருகின்றனர்.

இந்த நிலையில் சில நாட்களுக்கு முன்பு தலைமைச் செயலகத்தில் உள்ள பொதுக்கணக்கு குழு பிரிவில் ஊழியர் ஒருவருக்கு கொரோனா தொற்று உறுதி செய்யப்பட்டது. அதைத்தொடர்ந்து அந்த அலுவலகம் மூடப்பட்டது.

ஆனால் அங்கு கொரோனா பரவல் தொடர்ந்து நீடித்தது. இதுவரை 30 பேருக்கு தொற்று உறுதி செய்யப்பட்டு இருப்பதாக தலைமைச் செயலக வட்டார தகவல்கள் தெரிவிக்கின்றன.

முதல்-அமைச்சரின் செயலாளர் பிரிவில் ஒரு ஆண் மற்றும் ஒரு பெண் ஊழியர் என 2 பேருக்கு தொற்று ஏற்பட்டு உள்ளது. தமிழ் வளர்ச்சித்துறை, செய்தித்துறை, பொதுப்பணித்துறை, நிதித்துறை உள்ளிட்ட துறைகளில் பணியாற்றுவோர் 30 பேர் பாதிக்கப்பட்டு உள்ளனர். இவர்கள் அலுவலக உதவியாளர், பிரிவு அலுவலர், தட்டச்சர் உள்ளிட்ட பணியில் உள்ளனர்.

இவர்களில் சிலர் வீடுகளில் தனிமைப்படுத்தப்பட்டு உள்ளனர். பலர் மருத்துவமனைகளில் தங்கி சிகிச்சை பெற்று வருகின்றனர்.

50 சதவீத பணியாளர்களுடன் செயல்பட தொடங்கிய 2 வாரங்களுக்குள் 30 பேருக்கு தொற்று கொரோனா தொற்று ஏற்பட்டு இருப்பது, தலைமைச் செயலக ஊழியர்களிடையே அச்சத்தை ஏற்படுத்தி இருக்கிறது.

இந்த நிலையில் பெண் ஐ.ஏ.எஸ். அதிகாரி ஒருவருக்கும் கொரோனா தொற்று உறுதி செய்யப்பட்டு இருப்பதாக தகவல் வெளியாகி, மேலும் அதிர்ச்சியை ஏற்படுத்தி உள்ளது. 44 வயதான அவர் சிகிச்சை பெற்று வருகிறார். அவரது குடும்பத்தினர் தனிமைப்படுத்தப்பட்டு உள்ளனர்.

சென்னை சேப்பாக்கம்-திருவல்லிக்கேணி தொகுதி தி.மு.க. எம்.எல்.ஏ.வாக இருப்பவர் ஜெ.அன்பழகன். 61 வயதான இவர் தியாகராயநகரில் வசித்து வருகிறார். இவருக்கு கடந்த சில நாட்களுக்கு முன்பு உடல்நிலை பாதிக்கப்பட்டது. இதற்காக சென்னை குரோம்பேட்டையில் உள்ள தனியார் ஆஸ்பத்திரியில் அனுமதிக்கப்பட்டார்.

அங்கு நடத்தப்பட்ட பரிசோதனையில் ஜெ.அன்பழகனுக்கு கொரோனா வைரஸ் பாதிப்பு இருப்பது உறுதியானது. இதனால் அவர் தொடர்ந்து ஆஸ்பத்திரியில் சிகிச்சை பெற்று வருகிறார்.

இந்த நிலையில் திடீரென அவருக்கு மூச்சுத்திணறல் ஏற்பட்டதால் ‘வென்டிலேட்டர்’ மூலம் செயற்கை சுவாசம் அளிக்கப்படுகிறது. உயிருக்கு ஆபத்தான நிலையில் அவர் தீவிர சிகிச்சை பெற்று வருகிறார்.

சென்னை போலீசில் ஏற்கனவே ஒரு கூடுதல் கமிஷனர், 2 துணை கமிஷனர்கள், 7 உதவி கமிஷனர்கள், 12 இன்ஸ்பெக்டர்கள், 50-க்கும் மேற்பட்ட சப்-இன்ஸ்பெக்டர்கள் என 380 பேர் கொரோனாவால் பாதிக்கப்பட்டு உள்ளனர்.

இந்த நிலையில் சென்னை போலீஸ் கமிஷனர் அலுவலகத்தில் பணிபுரியும் உளவு பிரிவு பெண் போலீஸ் இன்ஸ்பெக்டர், சிந்தாதிரிபேட்டை இன்ஸ்பெக்டர் உள்பட 6 பேருக்கு புதிதாக தொற்று உறுதி செய்யப்பட்டு இருக்கிறது.

இதனால் சென்னை போலீசில் கொரோனாவால் பாதிக்கப்பட்டவர்களின் எண்ணிக்கை 386 ஆக அதிகரித்து உள்ளது.

CLICK PHOTO TO JOIN

CLICK PHOTO TO JOIN