மத்திய இடைநிலை கல்வி வாரியத்தின் (சி.பி.எஸ்.இ), 2024-25-ம் கல்வியாண்டு வருகிற ஏப்ரல் 1-ந் தேதி தொடங்குகிறது. இந்த நிலையில், 9-ம் வகுப்பு முதல் பிளஸ்-2 வரையிலான 2024-25-ம் கல்வியாண்டுக்கான பாடத்திட்டத்தை சி.பி.எஸ்.இ. வெளியிட்டுள்ளது.
அந்த வகையில், 9 மற்றும் 10-ம் வகுப்புக்கான பாடத்திட்டத்தில், 2 மொழிப்பாடம், கணிதம், அறிவியல், சமூக அறிவியல் ஆகியவை கட்டாய பாடங்களாக சேர்க்கப்பட்டு உள்ளன. மேலும், 3-வது மொழி (தமிழ் உள்பட உள்ளூர் மொழிகள்) மற்றும் தேர்ந்தெடுக்கப்பட்ட பாடம், திறன் மேம்பாட்டு பயிற்சி ஆகியவை விருப்பப்பாடமாக சேர்க்கப்பட்டு உள்ளன.
கலை படிப்பு, உடற்கல்வி, உடல் நலம், தொழிற்பயிற்சிகள் ஆகியவற்றை உள்மதிப்பீட்டுக்காக பள்ளிகளே தேர்வு செய்து கொள்ளலாம் என்று தெரிவிக்கப்பட்டு உள்ளது. அதேபோல், பிளஸ்-1 மற்றும் பிளஸ்-2 பாடத்திட்டத்தில், 9 பாடங்கள் இடம் பெற்றுள்ளன. இதில், 5 கட்டாயப்பாடங்களும், 4 விருப்பப் பாடங்களும் இடம் பெற்றுள்ளன. 3-வது மொழியாக தமிழ் உள்பட 34 மொழிகளை தேர்வு செய்யலாம் என்று சி.பி.எஸ்.இ. தெரிவித்துள்ளது.
