ஒரு விரிசல்
எங்கு தொடங்குகிறது...?
நீ நீயாகவே இருப்பதிலோ
நான் நானாகவே இருப்பதிலோ
யாரோ ஒருவருக்கு
சலிப்புகள் ஏற்படும்போது...
"எப்போதும் உன்னைப் பற்றிய
சிந்தனைதான்" என
பரஸ்பரம் ஒருவரையொருவர்
குற்றம்சாட்டிக் கொள்ளும்போது...
"எனக்காக நீ என்ன செய்தாய்?
இதுவரை செய்ததெல்லாம் போதும்"
என்ற வார்த்தைப் ப்ரயோகங்கள்
முன்னைக் காட்டிலும் அதிகமாகப்
பயன்படுத்தப்படும்போது...
எந்தத் திரையுமின்றி
எந்தத் தடங்கலுமின்றி
ஒருவர் கதைகளை இன்னொருவரிடம்
பகிர்தலில் சிறு தயக்கங்கள் வரும்போது...
உரிமையாய் செய்யும்
சில செயல்களில்
"ஏன் சொல்லவில்லை,
எப்படி இதைச் செய்யலாம்?"
எனப் புதிதாய் கேள்விகள் எழும்போது...
நொடிக்கொருமுறை
பொசுக் பொசுக்கென்று
கேட்ட மன்னிப்புகள்
கோடையில் காய்ந்த காவிரியாய்
வறண்டு போகும்போது...
நீள நீளமாய்
நீண்ட சம்பாஷைனைகள்
சட்டென குறைந்துபோய்
அடுத்து என்ன பேசுவதென
தயக்கங்கள் தோன்றும்போது...
உன் வலி
அவனுக்கு எரிச்சலையும்
அவன் வலி
உனக்கு சலிப்பையும்
உணர்த்தும் போது...
அடித்துப் பிடித்து எடுத்த
அலைபேசி அழைப்புகள்
கடந்த காலமாகிவிட
நிகழ்கால அழைப்புகள்
மெளன நிலைக்குத்
தள்ளி வைக்கப்படும்
கணங்களின் போது...
நல்லவைகள், பேரன்புகள்,
பெரு மகிழ்ச்சி தருணங்கள்
அனைத்தும் மறந்துபோய்
கொம்பு வைத்த சாத்தானின்
உருவத்தில் பரஸ்பர முகங்கள் தெரியும்போது...
-பிரபுசங்கர்.க
